На 8 и 9 април, во хотелот Холидеј Ин во Скопје, се одржа годишниот меѓународен собир на синдикатите од Централна Европа и Западен Балкан, во организација на Европската федерација на синдикатите од јавниот сектор (EPSU).
На настанот учествуваа претставници од целиот регион, при што на секој синдикат му беше овозможено свое излагање, преку кое ја презентираше синдикалната состојба во својата земја. Во рамки на излагањата беа опфатени клучните предизвици со кои се соочуваат синдикатите, состојбата со работничките права, како и практиките и предизвиците во процесот на колективно договарање.
Овие презентации поттикнаа суштинска и продлабочена дискусија за различните национални контексти, но и за заедничките предизвици со кои се соочуваат синдикатите во регионот, овозможувајќи размена на искуства и добри практики во насока на нивно надминување.
Генералниот секретар на EPSU, Јан Вилем Гудриан, ги истакна главните предизвици со кои се соочуваат синдикатите во современи услови, нагласувајќи дека единството е клучно во борбата за унапредување на работничките права.
Во рамки на настанот, свое излагање имаше и САДУ, каде како едно од најзначајните постигнувања во изминатиот период беше истакнато потпишувањето на колективни договори во повеќе институции, при што дел од нив за првпат воспоставија ваква практика.
Беше нагласено дека овие договори претставуваат резултат на конструктивен социјален дијалог и партнерски однос со институциите, придонесувајќи кон подобро уредување на работните односи, зајакната заштита на правата на вработените и унапредување на севкупните услови за работа. Истовремено, тие претставуваат јасен показател дека синдикалното делување може да донесе конкретни и видливи резултати.
Дводневниот собир беше посветен на зајакнување на улогата и капацитетите на синдикатите во регионот, со посебен акцент на нивната адаптација кон современите општествени и економски текови. Во фокусот беа предизвиците поврзани со промените на пазарот на труд и потребата од поефикасна заштита на правата и интересите на работниците.
